மாணவர் முரசு
இ-பேப்பர்
புக்கிட் மேராவின் பூன் தியோங் சாலையில் உள்ள ஐந்தறை வீடு ஒன்று $1,588,000க்குக் கைமாறியுள்ளது.
சிங்கப்பூரில் இதுநாள்வரை மறுவிற்பனை செய்யப்பட்ட ஆக விலையுயர்ந்த வீடமைப்பு வளர்ச்சிக் கழக (வீவக) வீடு இதுவாகும்.
புரோப்னெக்ஸ் ரியால்டி சொத்து முகவர்களில் ஒருவர் ஏப்ரல் 28ஆம் தேதி அந்த வீட்டின் பரிவர்த்தனையை மேற்பார்வையிட்டதாக செவ்வாய்க்கிழமை (ஏப்ரல் 30) அந்நிறுவனம் அறிவித்தது.
இதற்கு முன்னர், கடந்த ஜனவரி மாதம், லோரோங் 1ஏ தோ பாயோவில் உள்ள வடிவமைத்து, கட்டி, விற்கும் திட்டத்தின்கீழான ஐந்தறை வீடு ஒன்று $1,569,000க்கு மறுவிற்பனையானதே சாதனையாக இருந்தது.
தற்போது புதிய சாதனை படைத்துள்ள வீடு, பூன் தியோங் சாலையில் 40 மாடிக் கட்டடமான புளோக் 9பியின் 35வது மாடிக்குமேல் அமைந்துள்ளது. 112 சதுர மீட்டர் பரப்பளவைக் கொண்ட அந்த மறுவிற்பனை வீடு, 2016 ஜனவரியில் தொடங்கி 99 ஆண்டு குத்தகையைக் கொண்டுள்ளது.
தியோங் பாரு வியூ என்று அழைக்கப்படும் வீவக திட்டத்தின் ஒரு பகுதியாக அந்த வீடு உள்ளது. அத்திட்டத்தில் 9ஏ, 9பி, 10ஏ, 10பி என நான்கு புளோக்குகள் உள்ளன.
புளோக் 9பி பூன் தியோங் சாலையில் மட்டும் மூன்று நாலறை வீடுகள், 10 ஐந்தறை வீடுகள் என 13 வீடுகள், குறைந்தது $1 மில்லியனுக்குக் கைமாறின.
தியோங் பாரு வியூ என்பது 110, 111, 113, 114 புக்கிட் மேரா வியூ ஆகிய புளோக்குகளுக்கான சிங்கப்பூரின் ஒட்டுமொத்த மறுமேம்பாட்டுத் திட்டத்தின்கீழ் உள்ள மாற்று வீடமைப்புத் தலமாகும். புக்கிட் மேரா வியூ வீடுகள் இடிக்கப்பட்டுவிட்டன.
